Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

A Xunta acometerá unha rehabilitación integral no colexio lalinense Xoaquín Loriga de Prado

E baralla actuacións de melloras no Mosteiro de San Salvador de Camanzo, en Cruces

Rodríguez, con membros do goberno de Lalín, e outras persoas, durante a visita a Prado.


Laura Moure/Deza

O Plan de Nova Arquitectura Pedagóxica vai supoñer un “cambio radical de concepto” en canto ao deseño e intervención nos centros escolares, que a partir de agora van estar “pensados e configurados para afrontar os retos educativos do futuro que, ademais das necesidades académicas, inclúen tamén as sanitarias e as tecnolóxicas”. Así o asegurou hoxe o conselleiro de Cultura, Educación e Universidade, Román Rodríguez, nunha visita ao CEIP Xoaquín Loriga de Prado, Lalín, un centro no que precisamente a Xunta de Galicia vai acometer unha rehabilitación integral que se vai cinguir ás premisas marcadas neste plan.


Logo de ser aprobado polo Consello da Xunta, vaise abrir unha rolda de contactos para enriquecer o documento final de xeito que se converta na folla de ruta para o deseño dos novos colexios e institutos na etapa poscovid, onde a arquitectura teña unha orientación educativa.


Román Rodríguez explicou que este Plan de Nova Arquitectura Pedagóxica é froito “dunha profunda e necesaria reflexión neste contexto de pandemia que nos tocou vivir” e que puxo de manifesto “a importancia do colexio non só como un lugar para adquisición de coñecementos, senón tamén como lugar de encontro e de interacción social, onde os nenos pasan a meirande parte do seu tempo”.


Novo modelo de escolas

O plan, que supón unha inxección económica de 191 millóns de euros para esta lexislatura, “será a guía para a definición e o deseño dos novos espazos educativos de xeito que dean resposta ás necesidades educativas, sanitarias e tecnolóxicas do futuro”, abondou o conselleiro. Así pois, reforzarase un novo modelo de centros escolares na etapa poscovid, con espazos abertos á interacción social, máis flexibles e versátiles, preparados para avanzar na transformación dixital, máis confortables, máis saudables e máis sostibles desde o punto de vista ambiental.


O plan pivota nunha parte académica (con espazos ao servizo dos proxectos educativos, sobre todo vinculados á transformación dixital, e xeradores de inclusión), nunha parte infraestrutural (con espazos máis amplos, saudables e unha maior integración coa contorna) e nunha parte de sustentabilidade acorde coas novas esixencias de eficiencia enerxética e respecto medioambiental. Nesta liña, todas as reformas de espazos e os novos centros educativos que se leven a cabo de aquí ao ano 2024, e cuxas actuacións específicas se irán concretando proximamente, van seguir unhas pautas específicas definidas e obxectivas acordes cos retos marcados neste manual.


Visita ao mosteiro de Camanzo.

Por outra banda, o exmandatario cruceño Jesús Otero agradece a visita de hoxe de Rodríguez e do secretario xeral de Política Lingüística, Valentín García, ao Mosteiro de San Salvador de Camanzo. "Unha visita coa que se prentede acadar o apoio para facer actuacións de restauración, tanto no seu famoso bacelo, o máis antigo de Galicia, como no conxunto arquitectónico do monumento", sinala Otero. Ademais, incide que isto era unhas das actuacións contempladas no programa electoral das eleccións do ano 2019 do PP de Vila de Cruces.

29 vistas0 comentarios
IRS.jpg

ESPAZO DISPOÑIBLE PARA ANUNCIARSE