top of page

A Xunta acometerá as obras de reforma e mellora do colexio de Silleda cun investimento de 436.000 €

O goberno municipal valora positivamente o anuncio da Consellería de Educación, pero advirte que non é suficiente


Laura Moure/Silleda

A Xunta de Galicia vai acometer unha importante obra de reforma e mellora do colexio plurilingüe CEIP de Silleda, cun investimento que acadará os 436.000 euros. Así o avanzou esta mañá o conselleiro de Cultura, Educación, FP e Universidades, Román Rodríguez, nunha visita a este centro para presentar ante a comunidade educativa os traballos que se van a desenvolver.

O titular de Educación do Goberno galego explicou que a intervención engloba tres grandes actuacións que son a reforma dos aseos da planta baixa, da entreplanta, da planta primeira e da segunda, a substitución das cubertas do edificio de primaria e a ampliación da aula de música.

Así mesmo lembrou que a previsión inicial para esta intervención era de 100.000 euros, pero unha vez completado o proxecto, o investimento “multiplícase por catro con respecto a esta previsión ata superar os 400.000 euros”, suba derivada da decisión da Consellería de ampliar o número de actuacións e da alza de prezos.

Nestes momentos, a Consellería de Educación está ultimando os pasos administrativos para poder licitar o proxecto nas vindeiras semanas. En canto á obra, que terá un prazo de execución de catro meses a contar desde a adxudicación, prevese que estea rematada en outono.

Plan de Nova Arquitectura Pedagóxica

Román Rodríguez subliñou que esta actuacións suporá unha mellora do confort para a comunidade educativa deste colexio, “na mesma liña que a reforma do colexio Ramón de Valenzuela, que estamos a piques de adxudicar, cun investimento de 391.000 euros”, onde lembrou que tamén se actúa nas cubertas e nos aseos, entre outros. Os traballos desenvolveranse seguindo as especificidades marcadas no Plan de Nova Arquitectura Pedagóxica para acadar recintos escolares máis cómodos, seguros e sustentables.

Así pois, contando tamén as melloras no instituto Plurilingüe Pintor Colmeiro, o investimento da Xunta en centros educativos de Silleda elévase a 923.000 euros na actualidade, o que, en palabras do conselleiro, “é a proba máis evidente do compromiso que temos desde o Goberno galego coas infraestruturas escolares deste Concello”.


Valoración do Concello

Pola súa parte, o alcalde de Silleda, Manuel Cuiña, valora positivamente o investimento anunciado para este centro, “pero aínda así non nos parece suficiente á vista do estado do

mesmo”. Cuiña, que lle trasladou o parecer do goberno municipal ao conselleiro durante a súa visita hoxe a Silleda, entende que estas actuacións son as máis urxentes para subsanar “as graves deficiencias que presenta este centro, o máis antigo e co maior número de alumnos e alumnas”.


“Esperemos que unha vez executadas estas cuestións máis apremiantes se continúen acometendo as melloras necesarias para a reforma integral que vimos demandando dende hai anos, ca substitución das ventanas de ferro que aínda quedan, ou a dotación dun patio cuberto ou no seu caso unha pasarela permita ao alumnado do edificio de Infantil chegar sen mollarse ata o comedor do centro”, engade.


Dende o goberno municipal, que incluso no ano 2018 ante o mal estado do centro planteou á Consellería de Educación a construción dun novo colexio, sempre se viu reclamando esta opción ou no seu caso unha reforma integral para rematar cos problemas e deficiencias existentes, agravadas polo paso do tempo.


“Agradecemos a inversión, pero non é suficiente”, remarca o rexedor, que advirte “que estaremos atentos para que non se deixe de lado este centro unha vez acometidas estas actuacións”, engade.



0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page