A Xunta achega 114.000 € para adaptar a antiga cámara agraria como biblioteca en Boimorto

O Consello dá luz verde á sinatura do convenio entre o Goberno galego e o concello coruñés para levar a cabo esta intervención, que se desenvolverá en dúas anualidades

Laura Moure/Boimorto

A Consellería de Cultura, Lingua e Xuventude achegará 114.000 euros para levar a cabo obras de adaptación no primeiro andar do antigo edificio da Cámara Agraria para uso da biblioteca de Boimorto, na liña do seu plan de axudas para a divulgación, información e promoción da cultura en todo o territorio, no marco do Plan de mellora das infraestruturas no que traballa a Administración autonómica e en liña coa Lei de cultura inclusiva e accesible de Galicia. Así se acordou hoxe no Consello da Xunta, no que se deu luz verde á sinatura do convenio entre o Goberno galego e o concello coruñés.

Deste xeito, o inmoble, que está destinado ao desenvolvemento de actividades artísticas, máis alá das literarias, será obxecto dunha intervención que incluirá a mellora da accesibilidade do edificio, a modificación dos acabamentos interiores, carpintarías e falso teito acústico, a renovación do sistema de climatización con bombas de calor e casettes e o mantemento da linguaxe exterior da edificación.

Desde o executivo autonómico respóndese así á necesidade de pór solución á actual situación de accesibilidade do local, de maneira que se adecúe para ofrecer á veciñanza un espazo axeitado para fomentar a educación, a cultura, o acceso á información e a comunidade. Así, os traballos destinados a renovar a infraestrutura en beneficio da cidadanía, distribuiranse en dúas fases, de maneira que o investimento será repartido en dúas anualidades.

Publicidade

Preme na imaxe para obter máis información do evento.

Para este 2025 resérvase unha partida de 35.000€ para actuacións previas, demolicións, accións nas fachadas e particións e estrutura, principalmente. No 2026 a achega será de 79.000€ para intervir nas instalacións, carpintarías e proteccións solares, así como para desenvolver tarefas de revestimento ou trasdosados.

Estado do inmoble

O primeiro andar do antigo edificio da Cámara Agraria do Concello de Boimorto conta cunha entrada nula en termos de accesibilidade, consistente nunhas escadas dun só tiro, o que xera un importante problema de acceso. Por este motivo, cómpre substituílas por unha rampla exterior no lateral do inmoble e unhas escaleiras adaptadas de tres tramos, así como tamén colocar un ascensor accesible que comunique o acceso co andar no que está situado a actual biblioteca.

Publicidade

Así mesmo, os aseos do edificio carecen de adaptabilidade, polo que se proxecta un aseo accesible comunicado tamén co ascensor e co acceso. Por outra banda, a edificación conta con carpintarías en mal estado polo que se propón a súa modificación e a dos acabamentos interiores, ademais do falso teito acústico. Así, preténdense tamén melloras na climatización colocando un recuperador de calor, bombas de calor e casettes no falso teito, situados exteriormente na fachada medianeira. Neste senso, procurarase tamén manter a linguaxe exterior do edificio, mantendo a cor branca das carpintarías de aluminio.