A xincana segreda de Nadal volta ás rúas e comercios de Silleda o vindeiro 2 de xaneiro
As inscricións para participar nesta actividade familiar están xa abertas ata o día 29
Laura Moure/Silleda
O programa de Nadal de Silleda acollerá este ano novamente unha Xincana Segreda, que terá lugar o luns día 2 de xaneiro pola tarde. Esta actividade está dirixida ao público familiar e a participación será por equipos, cun máximo de 8 persoas participantes, a partir dos 6 anos (requiríndose sempre a presenza dunha persoa adulta en cada grupo).
Para participar, é preciso inscribirse previamente. A inscrición está xa aberta no Centro Social de Silleda, ou chamando ao 986 592 037.
Os equipos, aos que se asignará unha hora de saída, partirán dende o propio Centro Social de Silleda percorrendo o centro da vila, con probas e pistas tanto en comercios como en distintos puntos, interactuando tamén coa xente da rúa. Con esta actividade continúase apostando por dinamizar as rúas e fomentar a participación das familias no programa.
Será a primeira das actividades do ano 2023, que terá á Cabalgata de Reis do día 5 como unha das grandes actividades da programación.
