top of page

A subdelegada do goberno María Rivas visita a Asociación A Maristela de Sobrado que ten 400 socias

Tamén mantivo un encontro de traballo co alcalde, Luís Lisardo Santos

Laura Moure/Sobrado dos Monxes

A subdelegada do Goberno na Coruña, María Rivas, desprazouse este mércores ata o concello de Sobrado dos Monxes onde mantivo un encontro coa asociación de mulleres rurais A Maristela, unha asociación que naceu no ano 2000 co fin de cubrir o baleiro asociativo que existía no concello e de crear unha rede entre mulleres do municipio.


A Maristela, que conta con case 400 socias, realiza un importante labor de acollida de familias afgás ademais de acompañalas na súa integración, con algunhas das cales tivo oportunidade de falar a subdelegada para coñecer máis en profundidade a súa situación.

María Rivas trasladou ás integrantes da asociación o seu interese por coñecer e visibilizar outras realidades das mulleres diferentes ás urbanas: “Aínda que a desigualdade é transversal a todas nós, pola nosa condición de mulleres, existen outros elementos que inciden aínda máis nesa desigualdade como ocorre no ámbito rural”.

“Hoxe tiña especial interese en vir aquí para coñecer e recoñecer o traballo tan importante que facedes, os lazos e as redes que creades e que tanta importancia teñen no terreo emocional”, manifestou a subdelegada, poñendo de relevo a sororidade existente entre as mulleres. A subdelegada recalcou o seu orgullo “especialmente nun día como hoxe” por formar parte dun Goberno que demostrou con feitos a súa aposta pola igualdade e polas políticas centradas na muller.


Lembrou que España é o único país de Europa no que a igualdade de xénero constitúe un dos eixos fundamentais do Plan de Recuperación. “Somos conscientes de que é moi importante dotar de servizos ao rural para que poidades realizar as vosas actividades, as vosas vidas, e sobre todo fixar poboación,” explicou a subdelegada que engadiu que “cando falamos de falamos de reto demográfico pensamos sobre todo nas mulleres”.

A subdelegada tamén aproveitou a súa visita a Sobrado para manter un encontro de traballo co alcalde Luís Lisardo Santos. Rivas foi recibida no Consistorio polo mandatario e polo concelleiro Miguel Combo.

Durante o encontro, o rexedor trasladou a Rivas varias cuestións, tal e como informa o Concello:

  • Por unha banda, unha posible axuda estatal de 800.000 euros para implantar a tecnoloxía led no sistema de iluminación exterior do municipio.

  • Pola outra, a problemática existente coa fibra óptica da que aínda carece unha parte do concello.

Santos incidiu na necesidade de estender o internet de alta velocidade a todo termo municipal. A subdelegada comprometeuse a analizar esta situación e a buscarlle unha solución á maior brevidade posible.





0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page