A Ruta das Corredoiras de Arzúa recupera unha rede de corredoiras na contorna da parroquia de Pantiñobre

Cun percorrido circular de 15 quilómetros, ofrece aos visitantes a oportunidade de mergullarse na exuberante beleza paisaxística do entorno rural deste municipio

Laura Moure/Arzúa

O Concello de Arzúa, a través da súa concellaría de Turismo, complácese en anunciar a finalización do proxecto da Ruta das Corredoiras, unha iniciativa que recupera unha rede de antigas corredoiras nos arredores da parroquia de Pantiñobre, nun esforzo por enriquecer o turismo activo no interior de Galicia.

Esta ruta, cun percorrido circular de 15 quilómetros, ofrece aos visitantes a oportunidade de mergullarse na exuberante beleza paisaxística do entorno rural de Arzúa. Partindo desde a céntrica Praza de Galicia, os excursionistas poden desfrutar dun percorrido que remata no mesmo punto de inicio. A concelleira de Turismo, Begoña Balado, destaca a integralidade deste proxecto, resaltando que “grazas a esta iniciativa, recuperamos unha importante rede de corredoiras nos arredores da parroquia de Pantiñobre”. Estas corredoiras, que caeran en desuso, conservaban a súa morfoloxía orixinal, flanqueadas por ringleiras de carballos. Balado enfatizou que “as corredoiras formaban parte do mosaico agrario clásico galego, desaparecido en gran parte do país, polo que nos enorgullece este traballo de recuperación e posta en valor”.

Publicidade

Preme na imaxe para obter máis información!

Esta proposta súmase a outras iniciativas turísticas en Arzúa, como a Fervenza das Hortas, co obxectivo de posicionar á localidade como un destino de turismo activo no interior. “Somos un destino verde e esta ruta contribúe a fortalecer e visibilizar o rico entorno paisaxístico que posúe a nosa vila”, afirman desde o goberno local.

Rutas en primavera

Coa chegada da primavera, o goberno de coalición arzuán (BNG-AXA-PSOE) planea organizar grupos para desfrutar desta ruta, que atravesa puntos emblemáticos de Arzúa, como a capela de San Bieito coa súa cruz de madeira, a de San Xoán de Navas, a casa dos frades ou a pontella do Rego Carracedo.

Publicidade

Preme na imaxe se queres contactar connosco.

Begoña Balado concluíu que “a Ruta das Corredoiras será un referente para os amantes do sendeirismo e tamén para a propia comunidade local, que verá recuperado o seu patrimonio natural de antano”.