Sinala que nos últimos meses foron varias as peticións de información e encontros coa veciñanza á Xunta, "todas sen resposta"
Laura Moure/A Ulloa
A Plataforma Ulloa Viva considera “unha falta de respecto” que o presidente da Xunta de Galicia, Alfonso Rueda, este mércores no Parlamento galego, a sede na que está representado o pobo deste país, chamara “satélites” á Plataforma convocante da manifestación contra Altri en Palas de Rei o pasado 26 de maio. Diante destas afirmacións do presidente da Xunta, Ulloa Viva pide ao máximo mandatario galego “respecto” polas máis de 20.000 persoas chegadas de toda Galicia que encheron as rúas de Palas de Rei coas súas xustas e lexítimas críticas contra un proxecto dunha macrocelulosa que pon en perigo o corazón de Galicia.

A voceira de Ulloa Viva, Marta Gontá, criticou ademais que o presidente da Xunta se refira de xeito despectivo a unha plataforma veciñal que ten deixado claro que é “apartidista”. Ademais, Gontá lémbralle a Rueda que “nestes dous anos que levamos organizados e traballando a respecto deste proxecto, nos temos posto en contacto en varias ocasións co
señor Rueda, para pedir información á veciñanza e expresarlle as nosas preocupacións ao
respecto, e aínda estamos agardando a que dende a Xunta de Galicia se nos conteste e alguén se digne a reunirse con nós”.
Publicidade
A Plataforma Ulloa Viva quere deixar claro que “petamos e imos seguir petando en todas as portas, en Galicia, no Estado e en Bruxelas, para que se nos escoite e para que se atendan e teñan en conta as lexítimas preocupacións e demandas” tanto da veciñanza das zonas afectadas (A Ulloa, O Deza, Terra de Melide e Arzúa) coma a de todas as persoas que desbordaron o pasado domingo Palas de Rei dende todos os puntos de Galicia. Marta Gontá agradece o respaldo social recibido pola Plataforma “ao longo dos últimos meses e tamén na manifestación do domingo en Palas”, e por iso reclama do presidente da Xunta “alomenos respecto polo que os galegos e as galegas saen a demandar ás rúas”.
Gontá explica que “os veciños e veciñas non somos satélites de ninguén, nós estamos na terra, somos o pobo e coma tal esiximos que o presidente da Xunta nos teña respecto alomenos e valore con preocupación as demandas dun grupo masivo de xente unida, no
que hai xente de tódalas ideoloxías, sensibilidades e creenzas”. Dende a Plataforma Ulloa
Viva lamentan que “a posición da Xunta sexa a de acompañarse dunha empresa estranxeira e desprezar á veciñanza afectada polo proxecto da macrocelulosa”. De tódolos
xeitos, Gontá reitéralle a Rueda “a nosa disposición a escoitalo, a que veña e nos explique o proxecto, e a que resposte ás nosas preguntas e preocupacións”.
Publicidade
Dende a Plataforma Ulloa Viva, escoitando onte ao presidente da Xunta no Parlamento, “non entendemos que Rueda nos pida que agardemos a escoitar aos técnicos cando é
precisamente a Xunta de Galicia a que sen o dictame dos seus propios técnicos se
posiciona cada día ao lado da empresa, e mesmo xa ten dito o propio señor Rueda que está disposto a financiar o proxecto con cartos públicos sen que os técnicos se teñan
pronunciado aínda”. Marta Gontá advirte que a Plataforma “dende o primeiro momento amosou e amosa o seu respecto e confianza no traballo dos técnicos da Xunta que están a
avaliar o proxecto e as alegacións”, e pídelle a Rueda alomenos “o mesmo respecto para os galegos que o que lle amosa públicamente á empresa a diario”.
Comments