Perruquería Marisa.png

ESPAZO DISPOÑIBLE PARA ANUNCIARSE

A gastronomía de proximidade preséntase en Palas de Rei como recurso de valor para a promoción

Veciños e visitantes desfrutaron, xunto a produtores locais, dunha actividade que tamén

destacou o papel da fotografía gastronómica cun pequeno taller fotográfico


Laura Moure/Palas de Rei

Palas de Rei gozou este venres dunha mostra da mellor gastronomía local da man do cociñeiro Miguel Mosteiro e o proxecto Saborearche. A iniciativa, apoiada polo programa Ou Teu Xacobeo, da Xunta de Galicia, comezou a súa segunda edición cun evento de participación aberta que congregou a numerosos asistentes na Praza do Concello. Alí púidose gozar da elaboración en directo de varios pratos de proximidade, unha charla con produtores da zona e un breve taller fotográfico.

Por suposto, tamén houbo degustación. O queixo denominación de orixe Arzúa-Ulloa, o leite fresco, os ovos ecolóxicos ou a tenreira galega foron algúns dos produtos que centraron a proposta do cociñeiro Miguel Mosteiro. Un ‘Ovo a baixa temperatura con queixo Arzúa-Ulloa e faragullas de pan de broa e papada de Porco Celta’ serviu para que os asistentes abrisen boca para, a continuación, gozar dunha ‘Chaira de Tenreira Galega con mollo dos seus ósos e PakChoi’. A nota doce da xornada púxoa unha ‘Panacota de leite fresco con amoras salteadas e redución de vinagre’. Durante o evento, Mosteiro sinalou a calidade e o valor diferencial das propostas gastronómicas quilómetro cero, a súa importancia para alcanzar un desenvolvemento sostible e a súa gran relevancia como recurso para a promoción turística dos territorios do Camiño.

A este respecto, a xornada contou coa participación de representantes dalgunhas marcas de produtos ecolóxicos do municipio, como SenMáis, Arqueixal ou Campomayor. Para profundar no obxectivo de situar ás gastronomías locais como eixo da promoción turística do Camiño, ‘saborearche’ tamén contou coa presenza do fotógrafo Adolfo Enríquez, que compartiu cos asistentes algúns consellos e coñecementos para obter unhas instantáneas gastronómicas atractivas e de calidade. Ademais, as imaxes obtidas por Enríquez durante os eventos empregaranse para conformar unha exposición que regresará aos concellos participantes no mes de setembro. Todas as fotografías poñeranse ao dispor de institucións, empresas e particulares para o seu uso libre de dereitos en plataformas como Flickr. Unha ferramenta máis para continuar promocionando a excelente gastronomía galega e os seus produtos.

38 visualizaciones0 comentarios
IRS.jpg

ESPAZO DISPOÑIBLE PARA ANUNCIARSE