A Garda Civil investiga a dúas persoas pola subtracción de portas e ventás nun local de Vedra

Ecos da Comarca/Xeral

A Garda Civil do Posto Principal de Milladoiro Ames investigou a dous homes, veciños da Coruña de 21 e 22 anos de idade, como presuntos autores dun delito de furto, tras a subtracción de varias portas e xanelas instaladas nun local de titularidade municipal e uso público, situado na parroquia de San Xulián de Sales, no municipio de Vedra. Os feitos remóntanse ao pasado 26 de xaneiro, cando en plena luz do día foron subtraídas varias portas de dobre folla e xanelas de aluminio lacado, valoradas en conxunto en 12.000 euros.

Fonte: Garda Civil.

A denuncia foi interposta dous días despois, o 28 de xaneiro, no Posto da Garda Civil de Lestedo, o que deu inicio a unha investigación conxunta entre ambas as unidades.

Publicidade

Preme na imaxe para obter máis información do evento.

Durante o transcurso das dilixencias, os axentes realizaron distintas actuacións de investigación para o esclarecemento dos feitos. Grazas a estas xestións, foi posible identificar o vehículo utilizado para o transporte dos obxectos subtraídos.

A identificación dos usuarios habituais do mesmo —distintos do titular do vehículo— supuxo unha dificultade engadida, pero permitiu finalmente sinalar aos presuntos autores.

Publicidade

Preme na imaxe se queres contactar connosco.

Ambos os individuos foron localizados e citados para comparecer en dependencias da Garda Civil en Milladoiro, onde prestaron declaración en calidade de investigados. As dilixencias instruídas foron remitidas ao Xulgado de Instrución de Garda de Santiago de Compostela.