A Garda Civil detén a un incendiario en Toques

Está acusado dun delito de incendio con perigo para a vida e integridade física das persoas

Ecos da Comarca/Toques

A Patrulla de Protección da Natureza (SEPRONA) da Compañía de Santiago de Compostela, en colaboración cunha Patrulla de Seguridade Cidadá do Posto da Garda Civil de Boimorto, detivo in fraganti a un incendiario na localidade de Toques. No marco dos labores de prevención contra incendios levadas a cabo pola Garda Civil, o SEPRONA de Milladoiro e a Garda Civil de Boimorto procederon á detención e posta ao dispor xudicial dun veciño de Toques como presunto autor dun delito de incendio con perigo para a vida e integridade física das persoas.

O detido, residente na localidade e coñecedor da zona, provocou un incendio en “Irago de Arriba”, Toques, A Coruña, xerando un foco principal e dous secundarios. Un destes focos propagouse ata unha parcela cunha vivenda, causando gran alarma entre os veciños, quen xa estaban alerta debido a un incendio ocorrido catro días antes nunha masa arbórea a menos dun quilómetro dos focos do 16 de agosto.

Publicidade

Preme na imaxe para obter máis información.

A alerta inicial foi dada por un veciño da localidade, o que permitiu á central COS (Central Operativa de Servizos) da Garda Civil da Coruña comisionar rapidamente ao SEPRONA e á Garda Civil de Boimorto.

Grazas á rápida actuación dos axentes, procedeuse á detención do presunto autor, quen portaba consigo dous chisqueiros. Instruíronse as dilixencias correspondentes por un presunto delito de incendio con risco para a vida e integridade física das persoas. Ademais, tomouse declaración a testemuñas e realizouse unha reconstrución técnica do itinerario seguido polo presunto autor do incendio. Nesta reconstrución, os axentes identificaron claramente os tres focos do incendio, separados por escasos metros.

Publicidade

Preme na imaxe se queres contactar connosco.

O detido foi posto ao dispor do Xulgado de Primeira Instancia e Instrución de Arzúa. Cabe destacar que os terreos afectados atópanse dentro da Zona de Especial Conservación Rede NATURA 2000 “Serra do Careón”, un espazo protexido e próximo a vivendas. A rápida intervención dos medios de extinción, tanto aéreos como terrestres, impediu que o lume se propagase con maior rapidez, a pesar das condicións climatolóxicas adversas, con altas temperaturas que dificultaban a súa extinción.