A Garda Civil desarticula unha banda dedicada a delitos contra o patrimonio en Deza-Tabeirós e Santiago

Detivo a dúas persoas residentes en Teo, como presuntos autores de 30 roubos con forza en establecementos de hostalería

Ecos da Comarca/Deza

Nunha operación conxunta denominada “CONSIGNATARIO-LINEI”, a Garda Civil detivo a dúas persoas residentes en Teo, como presuntos autores de 30 roubos con forza en establecementos de hostalería. Os roubos cometéronse nas provincias de Pontevedra (comarca de Deza e Tabeirós), e A Coruña (Santiago de Compostela).

A investigación comezou en abril de 2024, cando o Equipo de Policía Xudicial da Garda Civil de Lalín e a área de Investigación do Posto Principal da Garda Civil de Milladorio Ames (A Coruña) detectaron unha serie de roubos en establecementos de hostalería nas comarcas de Deza e Tabeirós-Terra de Montes, así como en Santiago de Compostela.

Publicidade

Preme na imaxe para obter máis información do evento.

Ambas as unidades formaron un equipo de investigación conxunto para identificar os autores e recuperar os obxectos subtraídos. O modus operandi da banda consistía en fracturar xanelas ou cristais para acceder aos locais, seleccionados previamente por un dos detidos, quen traballaba nunha empresa de distribución de bebidas en Teo. Esta posición permitíalle obter información detallada sobre os establecementos e os puntos de acceso máis vulnerables.

Publicidade

Preme na imaxe para contactar con nós.

Os roubos centrábanse principalmente en pequenos locais de hostalería, buscando a recadación das caixas rexistradoras. Os detidos, con antecedentes por delitos similares, complicaron significativamente a investigación debido á súa experiencia neste tipo de roubos. Foi necesario un esforzo coordinado e exhaustivo de análise por parte das unidades policiais de Lalín e Milladorio-Ames para concluír que os roubos no ámbito xeográfico extenso, incluídos varios en Santiago de Compostela, estaban relacionados e eran cometidos polos mesmos delincuentes.

O día 31 de xullo de 2024, levou a cabo a fase de explotación da operación nas localidades de Os Tilos-Teo e Santiago de Compostela, onde se detiveron aos sospeitosos. Nos rexistros domiciliarios atopáronse efectos subtraídos e outros relacionados cos delitos investigados, tamén efectuaron numerosos danos materiais aínda por cuantificar.