A Garda Civil alerta sobre unha nova modalidade de estafa mediante suplantación de identidade

Ecos da Comarca/Xeral

O equipo@coruña da Garda Civil na Coruña detectou unha nova estafa na que ciberdelincuentes utilizan técnicas de suplantación de identidade para enganar aos cidadáns e facerse con terminais móbiles de alta gama, deixando ás vítimas con importantes débedas económicas.

A estafa comeza cunha chamada telefónica que aparentemente provén do número 1004, asociado ao servizo de atención ao cliente dunha compañía de telefonía. Os estafadores logran falsificar o identificador de chamadas (técnica coñecida como Spoofing) para simular a procedencia lexítima da comunicación. Na chamada, os delincuentes informan á vítima dun suposto cambio de router no seu domicilio, xa sexa porque a vítima previamente solicitou información ou como parte dunha estratexia de captación.

Posteriormente, os estafadores solicitan á vítima que facilite os códigos que recibe a través de mensaxes SMS. Esta práctica, coñecida como Smishing, permite aos ciberdelincuentes utilizar eses códigos para realizar compras na conta da compañía telefónica da vítima. Neste caso, adquiren un teléfono móbil de última xeración, que é enviado ao domicilio do afectado.

Cando o paquete chega ao domicilio, os estafadores contactan novamente á vítima para informarlle dun suposto erro no envío e indícanlle que debe devolver o paquete para recibir o router correcto. Para iso, organizan unha recollida do paquete a través dunha empresa de transporte. Desta forma, os ciberdelincuentes obteñen o terminal móbil mentres a vítima queda coa débeda correspondente á compra do dispositivo.

Publicidade    

Preme na imaxe se queres contactar connosco.

Recomendacións da Garda Civil para evitar ser vítima deste tipo de estafas:

 1. Verifique sempre a identidade do interlocutor. Se recibe unha chamada dun número oficial, confirme a información directamente coa empresa a través das súas canles oficiais. 2. Non facilite códigos nin datos persoais. Nunca comparta os códigos recibidos por SMS ou calquera dato sensible con terceiros, aínda que parezan representar a unha empresa de confianza.

3. Desconfíe de solicitudes de devolución de paquetes. Se recibe un paquete inesperado, contacte directamente coa empresa remitente antes de proceder a calquera devolución.

 4. Denuncie calquera sospeita. Se cre que foi vítima desta estafa, póñase en contacto coa Garda Civil e co seu provedor de servizos de inmediato.

A Garda Civil lembra a importancia de manterse alerta ante este tipo de fraudes, que se basean na confianza e o descoñecemento das vítimas.