Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

A Festa do Queixo de Arzúa celebrarase o 6 e 7 de marzo e será totalmente en streaming

O pregón será a cargo de escolares do municipio e o programa completase con showcookings, unha charla e música


Ortiga, actuará na Feira do Queixo.


Laura Moure/Arzúa

O Concello de Arzúa denominou esta 46ª edición da Feira do Queixo, que se leva celebrando desde 1976 de forma ininterrompida, como a “edición XS” por estar dedicada especialmente aos nenos e tamén polo seu programa de pequeno formato e adaptado este ano ao celebrarse totalmente online, con retransmisión en streaming de todas as actividades e concertos desde a web www.festadoqueixo.org Terá lugar o 6 e 7 de marzo.


O programa desta primeira fin de semana de marzo abrirase o sábado 6 ás 11:00 horas cun pregón compartido, protagonizado e escrito de xeito colaborativo polo alumnado dos centros educativos de Arzúa. "O protagonismo no pregón deste ano quíxose que fose para os escolares, que tan ben o están a facer nestes tempos difíciles, e a toda a comunidade educativa en xeral por todos os esforzos". Por isto, a idea do Concello foi convidar a todos os centros do municipio facendo entre todos o pregón. A mecánica consistirá en que un dos cursos a elixir polo propio centro redacte unha parte do pregón para que sexa continuado polo seguinte. O pregón completo será lido desde a capela da Madanela por un representante de cada centro.


O programa continúa a mañá do sábado co showcooking Desde Arzúa, con amor e queixo, levado a cabo por tres restaurantes e un centro educativo arzuán. O sábado 6 desde as 12:00 horas abrirán as demostracións os restaurantes 1930 Hotel Boutique e Casa Chelo. Nelssy Soriano, do 1930 Hotel Boutique, inaugurará o cociñado desde a cociña do recinto feiral Terra do Queixo preparándonos O Tótem, un entrepan de dobre tradición galega. A continuación, María José Sanmartín, de Casa Chelo, será a cociñeira encargada de pechar as demostracións do sábado preparando unha “diferente ensalada temperada con sardiñas afumadas e queixo de Arzúa”.


O domingo 7 a demostración de cociña terá tamén lugar desde o recinto feiral e ás 12:00 horas a quenda correrá a cargo de Pilar Rodríguez do restaurante Fonte do Picho, situado no Pazo Santa María, coa receita Arroz meloso con polbo e queixo Arzúa-Ulloa. Para rematar, Luisa Sánchez e María García da EFA Piñeiral, preparará unha doce sobremesa amosándonos a receita Doces campos de Arzúa-Ulloa.


Debate

Na tarde do sábado, ás 18:00 horas terá lugar a charla Os queixos galegos no tempo da COVID no set instalado na Capela da Madanela. Será un debate entre os representantes dos catro Consellos Reguladores dos queixos galegos con Denominación de Orixe Protexida: Arzúa-Ulloa, San Simón da Costa, Queixo Tetilla e Queixo do Cebreiro. A organización considerou citar en Arzúa aos catro representantes dos nosos queixos con DOP "xa que nestes tempos esta actividade pode ser unha boa oportunidade de promoción a nivel nacional e internacional a través da rede".


Concertos

No eido musical, o Festival do queixo tamén denominado XS, celebrará dous concertos, un para rematar cada xornada. Ortiga pechará a xornada do sábado 6 ás 21:00 horas. Este artista compostelán contemporáneo aposta por novos sons e conta cunha gran proxección a nivel estatal. Presentou recentemente o seu álbum debut Chicho & sus chichas, e como di el mesmo “se sentes un escozor, non chames ao doutor: escoita a Ortiga”. Aos puntos cegos da pena, Ortiga púxolles tiriñas que cheiran a cumbia millennial, autotune a feira, merengue diabólico e transversalidade sonora. Tan preto de Elvis Crespo, Os Merlos e Kinito Méndez como de Metallica e Slash. Ortiga dispara sonoridades tropicais a través dunha auténtica fábrica de baile millennial que, no canto de mirar ao Caribe, mira á Ría de Pontevedra e á praia de Porto do Son. Xa cho canta a propio Ortiga nunha das súas cancións; pero, por se non te dabas conta, que saibas que hai unha planta que a ti che encanta: a ortiga.

Alma Dueto poñerá o broche final a esta edición.


Por último, Alma Dueto pechará esta edición o domingo 7 ás 18:00 horas. O dúo está formado por Alejandro González e Maya Grillo debuta en 2013 en Cuba e a súa traxectoria artística despunta na República Dominicana. Reúnen unha longa experiencia musical, tanto no ensino da guitarra como na súa interpretación, calidade que lles permitiu levar a cabo este formato. O seu repertorio esténdese a máis dun centenar de pezas, con múltiples combinacións das súas guitarras e voces, tanto da música internacional como dos xéneros autóctonos cubanos. Ademais das obras orixinais para dúas guitarras, habituais nos grandes eventos guitarrísticos, teñen versións das cancións máis populares arranxadas para guitarra soa, dúas guitarras ou guitarra e voz.

74 vistas0 comentarios
IRS.jpg

ESPAZO DISPOÑIBLE PARA ANUNCIARSE