A Festa da Empanada de Bandeira presenta o 8 o seu cartel e adianta que recuperará o formato tradicional

Os actos principais terán lugar na tarde do sábado, mantendo como peche a tradicional cea de peñas, un dos sinais de identidade da celebración

Laura Moure/Silleda

A Asociación de Amigos da Empanada de Bandeira (Silleda) presentará o venres 8 de agosto, ás 21:00 horas, na Praza Juan Salgueiro de Bandeira, o cartel e a programación da XLIX edición da Festa da Empanada, a primeira que se celebra despois de obter o recoñecemento como Festa de Interese Turístico Nacional.

Nesta edición, a comisión decidiu recuperar o formato tradicional da festa. Os actos principais terán lugar na tarde do sábado, mantendo como peche a tradicional cea de peñas, un dos sinais de identidade da celebración.

Publicidade

Preme na imaxe para obter máis información.

Por motivos organizativos, este ano non se realizará o tradicional petitorio porta a porta. No seu lugar, a Asociación fai un chamamento á colaboración da veciñanza a través de achegas económicas voluntarias, que se poden ingresar na seguinte conta bancaria:

ES07 2080 5013 7230 0008 6620

As reservas para participar na cea de peñas estarán abertas do 6 ao 19 de agosto, en horario de 18:00 a 21:30 horas, na Casa da Cultura de Bandeira.

Publicidade

Preme na imaxe se queres contactar connosco.

Desde a Asociación de Amigos da Empanada agradécese expresamente o apoio recibido ata o momento e as achegas realizadas, fundamentais para garantir o desenvolvemento da festa.