A elite mundial do clarinete cítase en Lalín nun festival único en Europa

Celebrarase do 2 ao 9 de agosto e participarán clarinetistas da London Symphony Orchestra, a Royal Concertgebouw de Ámsterdam ou a Staatskapelle de Berlín

Laura Moure/Lalín

O VII Galicia Clarinet Fest foi presentado oficialmente onte ante os medios de comunicación, confirmando a súa posición como un dos grandes referentes pedagóxicos e artísticos do panorama musical europeo. O evento, que converterá a capital do Deza no epicentro internacional do clarinete entre o 2 e o 9 de agosto, contará cunha extraordinaria nómina de dezaoito docentes de renome mundial, dous pianistas acompañantes e arredor de 150 alumnos e alumnas procedentes de países tan distantes como o Reino Unido, Canadá, Estados Unidos, Francia, Alemaña, Arxentina ou Uruguai, ademais de participantes de todo o territorio español.

Clarinetistas da London Symphony Orchestra, da Royal Concertgebouw de Ámsterdam ou a Staatskapelle de Berlín daranse cita na capital do Deza, xunto con outros artistas que forman parte das mellores orquestras sinfónicas, conservatorios e universidades do panorama nacional e internacional. Á excelencia desta parte académica e pedagóxica, súmase un congreso no que participan 30 marcas internacionais de procedencias tan diversas como Canadá, Hungría, Macedonia ou Xapón, convertindo o festival, segundo apuntou o seu director artístico Xocas Meijide, nun evento único en Europa.

Entre as propostas orquestrais máis agardadas salientan os grandes concertos da Real Filharmonía de Galicia —dirixida por José Luis Estellés— e da Banda Municipal da Coruña, así como o gran concerto de clausura da Orquestra do Galicia Clarinet Fest onde profesorado e alumnado compartirán escenario, sumando máis de 150 músicos en escena.

 PUBLICIDADE

Preme na imaxe para obter máis información deste evento.

Dentro da programación do festival destaca a estrea mundial de "Camiño ao infinito” o novo e vangardista proxecto multidisciplinar de Xocas Meijide que fusiona o clarinete e o clarinete baixo con electroacústica, performance e vídeo-arte.

Unha das grandes novidades desta sétima edición é o ciclo "Noites de jazz en Lalín", unha serie de catro concertos nocturnos na Praza das Pipas e no Casino de Lalín que contarán coa participación dalgunhas das formacións máis reputadas do panorama jazzístico: Mery Lafuente & The Syncopated Men, Nani García Trío con Ricardo Formoso, Kid Carlos & Wolfgang Puntas, e Pablo Sanmamed Trío xunto a Benxa Otero.

A formación de novos talentos e a dinamización do tecido musical culminarán o sábado 8 de agosto coa celebración do IV Concurso Internacional Galicia Clarinet Fest, que repartirá máis de 10.000 euros en premios. Os galardóns inclúen bolsas de formación, instrumentos e a oportunidade única para os gañadores de actuar como solistas acompañados pola Real Filharmonía de Galicia e a Banda Municipal da Coruña na vindeira edición.

No acto de presentación, celebrado no Concello de Lalín, participaron José Crespo, alcalde de Lalín; Felipe Ferrero, xefe da área provincial de Turismo de Pontevedra; Jorge Cubela, deputado Provincial de Cultura; Begoña Blanco, concelleira de Cultura de Lalín; e Xocas Meijide, director artístico do festival.

Durante as súa intervencións, destacouse a importancia de que un concello das dimensións de Lalín, acolla un evento da magnitude do Galicia Clarinet Fest que pon a Lalín no mapa da elite cultural internacional, sublimando o carácter dun evento que aúna formación, música e convivencia e descentraliza un evento que polas súas características se celebraría nunha gran cidade.

 PUBLICIDADE

Preme na imaxe para obter máis información deste evento.

Como elemento diferenciador e de posta en valor do patrimonio cultural e lingüístico propio, todas as presentacións dos concertos correrán a cargo do contador e poeta Celso Fernández Sanmartín e da histórica compañía Viravolta Títeres, quen estenderán as marxes do estritamente musical creando pontes poéticas entre o son, o xesto e a palabra.

O Galicia Clarinet Fest conta co apoio institucional clave da Xunta de Galicia —a través da

Axencia Turismo de Galicia no marco dos Concertos do Xacobeo—, o Concello de Lalín e a

Deputación de Pontevedra, consolidándose non só como un fito cultural senón tamén como un motor económico e de atracción turística e cultural.