top of page
Perruquería Marisa.gif

A Deputación dotará de placas solares ao Consistorio, ao centro de saúde e ao albergue de Dozón

Laura Moure/Dozón

A Deputación de Pontevedra dotará de placas solares a once edificios dos concellos de Caldas de Reis, Catoira, Forcarei, Dozón e Ribadumia que contarán cunha potencia eléctrica total de 121,04 kW e unha produción anual estimada de 150.081 kW. Para facelo, contará cunha nova axuda do Instituto para a Diversificación e Aforro da Enerxía (IDAE) de 134.000 euros, o que revalida a aposta da Administración provincial polas enerxías sostibles.

O centro de saúde de Dozón. Autor: Ecos da Comarca.

En concreto, esta achega enmárcase dentro da medida de instalacións de xeración eléctrica renovable para autoconsumo da convocatoria de axudas para inversións a proxectos singulares locais de enerxía limpa en municipios de reto demográfico (DUS 5000) do Plan de Recuperación. O IDAE financia con esta subvención o 85% destas 11 instalacións solares fotovoltaicas, que serán de autoconsumo con vertido a rede de excedentes, mentres que o 15% restante (25.238 euros) repártese a partes iguais entre a Deputación e os concellos nos que se instalen.

Por concellos, o IDAE concede 47.233 euros para instalar as placas solares na Casa Consistorial Caldas de Reis, cuxa instalación terá unha potencia de 21,76 kW e unha produción anual estimada de 26.658 kW, e no polideportivo e a piscina municipal, cunha potencia de 20,4 kW e unha produción anual estimada de 23.876 kW. No caso de Catoira, con 17.767 euros as instalacións fotovoltaicas situaranse no Colexio Público Integrado, con potencia eléctrica de 10,88 kW e unha produción anual estimada de 12.677 kW, e no Pavillón de Deportes (5,44 kW e produción estimada de 7.023 kW). En canto a Dozón, procederase a colocar novas instalacións na Casa do Concello, con potencia eléctrica de 2,72 kW e produción anual estimada de 7.023 k W, no centro de saúde (2,72 kW e produción estimada de 3.478 kW) e no albergue (10,88 kW e produción estimada de 14.828 kW) cunha axuda de 17.767 euros.

As placas solares coas que se dotará á Casa do Concello de Forcarei, grazas a unha axuda de 9.145 euros, terán unha potencia eléctrica de 8,16 kW e unha produción anual estimada de 10.115 kW. Por último, no concello de Ribadumia as instalacións fotovoltaicas colocaranse na piscina e no Club Náutico, onde contarán cunha potencia eléctrica de 10,88 kW e unha produción anual estimada de 12.081 kW, na Casa da Cultura (10,88 kW e unha produción estimada de 13.227 kW) e no Complexo Deportivo (16,32 kW e unha produción anual estimada de 21.585 kW).

En total, ao longo do 2022, a Deputación recibiu de man do IDAE fondos europeos por valor de preto de preto de 4 millóns de euros que mobilizaron arredor de 3,5 millóns de euros para realizar actuacións nunha vintena de concellos da provincia en materia de eficiencia enerxética e mobilidade sostible.


28 visualizaciones0 comentarios
IRS.gif
Copia de ¡TU Anuncio!.gif
bottom of page