A Deputación de Lugo licita a mellora de case tres quilómetros na LU-P-0301, de Antas a Rodeiro

 O prazo de execución será de tres meses desde que comecen as obras

Ecos da Comarca/Antas de Ulla

A Xunta de Goberno da Deputación de Lugo aprobou este venres un novo investimento para mellorar a mobilidade da provincia por un importe de 2,23M€ en diferentes actuacións que afectan a estradas de todo o territorio. Así o informou a Voceira socialista do Goberno, Pilar García Porto, tras a sesión celebrada onte na que detallou que entre as diferentes actuacións, a institución licita tres proxectos e adxudica outros tres para mellorar seis estradas provinciais con 1,5M€. Entre estes proxectos figura un en Antas de Ulla, municipio do que García Porto é alcaldesa.

Publicidade

Preme na imaxe para obter máis información do evento.

Deste xeito, licitouse en Antas de Ulla un proxecto para mellorar case tres quilómetros na LU-P-0301, que une a vila de Antas co límite da provincia de Pontevedra, por Rodeiro. Os traballos, cun prezo de 152.181,89€, afectan ao treito comprendido entre o quilómetro 3,657 e o 6,527 e consisten na reapertura de cunetas, pavimentación con aglomerado en quente e sinalización. O prazo de execución será de tres meses desde que comecen as obras.

Publicidade    

Preme na imaxe se queres contactar connosco.

Unha actuación que, segundo as palabras de Pilar García Porto, “dará continuidade ós traballos que xa está a realizar a Deputación no tramo anterior da vía, que é o que dá acceso ó Parque Central de Galicia en Nugallás, con preto de medio millón de euros”.