A Deputación de Lugo lanza unha nova publicación para promocionar o románico na comarca da Ulloa
Trátase do subministro de 1.000 exemplares desta guía, así como un total de 2.000 trípticos complementarios
Laura Moure/A Ulloa
A Xunta de Goberno da Deputación de Lugo aprobou este venres a licitación do contrato para a edición de dúas novas publicacións sobre o románico da provincia, centradas na Ulloa e na zona dos Ancares, O Courel e Sarria, para a promoción do patrimonio deste estilo arquitectónico como reclamo turístico. Así o anunciou esta mañá a voceira socialista do Goberno provincial, Pilar García Porto, na rolda de prensa posterior a reunión semanal do Executivo.
Trátase do subministro de 1.000 exemplares de cada unha das guías, así como un total de 2.000 trípticos complementarios a través dun contrato que sae a licitación por un importe de 35.000 euros. Miguel Mendoza é o autor das obras, ilustradas con fotos de Pepe Tejero e Roberto Díaz, e editaranse en galego, castelán e inglés. Lembrou que estas novas publicacións dan continuidade á que xa lanzou a Deputación hai un ano sobre o románico da Ribeira Sacra, “cunha excepcional acollida”.
“Co proxecto destas guías queremos dar a coñecer e poñer en valor un patrimonio que é unha sinal de identidade e un poderoso reclamo turístico, ao redor do que seguir consolidando unha oferta de calidade, sostible, non masificada e de experiencias”, explicou García Porto. Neste sentido, destacou a importancia do románico na provincia de Lugo, “un dos un dos máis importantes de España e de Europa, como demostra que Lugo forma parte da Ruta Transrománica do Consello de Europa grazas á iniciativa da Deputación”.
Para completar esta colección unicamente restaría o último tomo, que se corresponde ás comarcas de Lugo, Terra Chá e A Mariña, e que está previsto realizar no ano 2023.
