A Deputación de Lugo activa o programa Xunt@s, con actividades gratuítas, de lecer e formación para contribuír ao envellecemento activo no rural

Esta iniciativa chegará este luns 22 de xaneiro a Antas de Ulla

Laura Moure/Antas de Ulla

A Deputación de Lugo vén de poñer en marcha o programa Xunt@s, de actividades gratuítas, de lecer e formativas para contribuír ao envellecemento activo no rural, “para enriquecer a oferta de ocio e cultural dos pequenos concellos e, polo tanto, para mellorar a calidade de vida dos veciños e veciñas, un factor determinante para fixar poboación no territorio”. Este mes chegará a Antas de Ulla.

Publicidade

A voceira socialista, Pilar García Porto, anunciou que esta iniciativa, á que a Deputación destina un total de 91.000€ e que está organizada da man dos concellos, consiste nunha serie de 125 xornadas temáticas gratuítas, que se celebrarán ata a primavera por toda a provincia, e que teñen que ver coa saúde, co deporte ou coas novas tecnoloxías. Explicou García Porto que o xoves pola tarde tivo lugar a primeira destas actividades do programa Xunt@s, en Pedrafita do Cebreiro, e para este mes están previstas outras 13 xornadas, nos concellos de Trabada, Antas de Ulla, Taboada, Navia de Suarna, A Pontenova, A Fonsagrada e Guitiriz.

Publicidade

“Este tipo de actividades fomentan a interacción da xente e contribúen a fortalecer os lazos da comunidade”, valorou a Deputada, para quen “a propia temática das xornadas favorecerá os hábitos de vida saudable, a práctica de actividade física, educar en prevención ou romper a brecha dixital integrando as novas tecnoloxías na vida diaria da xente”. 

Publicidade

Lembrou que desde punto de vista do Goberno provincial e do seu presidente, José Tomé Roca, “o rural de Lugo non é un territorio baleiro, porque está cheo de ideas, de emprendemento e de ganas de facer cousas”. “O que necesita o rural é que as administracións apostemos por dotalo de servizos públicos para que a xente se poida quedar nel. Iso é polo que estamos traballando cada día dende a Deputación de Lugo, tamén con este programa Xunt@s que agora poñemos en marcha”, subliñou.

En Antas de Ulla será este luns 22 de xaneiro na Casa da Cultura de Antas de Ulla ás 19:00 horas. "Unha xornada temática gratuíta para impulsar os hábitos de vida saudable, a práctica de actividade física, educar en prevención e romper a brecha dixital integrando as novas tecnoloxías na vida diaria da xente”, explica a alcadesa, Pilar García Porto.

"Animádevos a asistir!", engade a mandataria.