"Este proxecto debería de estar tramitado e, de ser o caso, autorizado a principios do vindeiro ano", subliña
Laura Moure/A Ulloa
O pasado 18 de abril ECOS DA COMARCA dirixiuse á Consellería de Economía e Industria para solicitar o número de alegacións presentadas ao proxecto que Altri/Greenfiber pretende instalar en Palas de Rei. Obtivemos resposta este martes, 28 de maio. A Consellería fala de 23.000 alegacións.

"Tal e como avanzou a conselleira de Economía e Industria nunha entrevista radiofónica esta mañá, o número de alegacións rexistradas respecto do proxecto para a construción dunha biofábrica de fibras téxtiles en Palas de Rei xira en torno ás 23.000, que se corresponden con 23 modelos diferentes. Cómpre subliñar que en nun bo número de casos se ten detectado que a mesma persoa asinou varios modelos de alegación, computándose todos eles igualmente", puntualiza a Consellería.
Publicidade
A partir deste momento, sinala, "procederase ao estudio pormenorizado de cada unha das alegacións presentadas, co propósito de estimar todas aquelas propostas que melloren o proxecto e corrixir aquelas cuestións que sexan susceptibles".
Publicidade
Así mesmo, apunta que "cómpre lembrar que a Lei de medidas establece uns prazos para aqueles proxectos recoñecidos como “Proxecto industrial estratéxico” como é o caso de Altri. Nomeadamente, o prazo dun ano de tramitación desde que se someteu a información pública. Polo tanto este proxecto debería de estar tramitado e, de ser o caso, autorizado a principios do vindeiro ano".
Comments