A Casa das Mulleres de Arzúa acolleu unha xornada técnica contra as violencias machistas

Participaron forzas de seguridade e persoal técnico de Arzúa, Boimorto, Melide, O Pino, Touro e Santiso

Laura Moure/Arzúa

A Casa das Mulleres do Concello de Arzúa acolleu o pasado venres unha xornada técnica para mellorar a resposta institucional fronte ás violencias machistas. Participaron efectivos da Garda Civil dos postos de Arzúa, Boimorto, Melide, O Pino e Touro, así como o equipo VioGén da zona. Tamén asistiu persoal técnico dos servizos sociais de Boimorto e Santiso, das áreas de igualdade de Touro e do CIM de Melide, xunto coa xefa da Unidade de Violencia sobre a Muller da Subdelegación do Goberno en A Coruña.

Durante a sesión analizouse a situación da violencia de xénero no Partido Xudicial de Arzúa, reforzouse a coordinación entre institucións e presentáronse recursos clave como os centros de crise 24 horas. O obxectivo común foi avanzar cara a unha resposta máis eficaz, próxima e libre de revitimización para as mulleres que deciden denunciar.

Publicidade

Preme na imaxe se queres contactar connosco.

Interviñeron profesionais con experiencia directa na atención ás vítimas: Manuela Vilaboy (Subdelegación do Goberno), Adrián M. Gonçalves, director do CIM de Arzúa, Begoña Riveira e María Gómez (CIM Arzúa), e Inés Rodríguez Leira (centro de crise de Santiago).

“Fronte ás violencias machistas temos que responder xuntas, con coordinación e compromiso. As mulleres non están soas. Desde o Concello apostamos pola formación e o traballo en rede para axudar a cada vítima a conquistar a súa liberdade, que non é máis que a liberdade de todas”, explicou Lucía López, concelleira de Igualdade de Arzúa.

A xornada reafirma o compromiso do Concello cunha resposta feminista, profesional e en rede tamén no rural, onde a igualdade e a loita contra a violencia deben estar presentes con forza e recursos.