A Asociación Amigos da Empanada de Bandeira presentará o cartel da súa festa o 1 de agosto

Convida aos socios, á veciñanza e aos visitantes a asistir ao acto no que haberá desgustación de empanada e polbo

Laura Moure/Silleda

A Asociación Amigos da Empanada de Bandeira convida a toda a veciñanza e visitantes ao acto de presentación, que terá lugar o sábado 1 de agosto ás 19:00 horas. Será ese día cando anunciará a presentación oficial dos carteis da 50ª edición da Festa da Empanada, un fito que marca medio século dunha das citas gastronómicas máis queridas da comarca.

Presentación do cartel da pasada edición.

 PUBLICIDADE

Preme na imaxe para obter máis información deste evento.

O acto terá lugar o vindeiro sábado, 1 de agosto, ás 19:00 horas, e servirá para dar a coñecer a imaxe que representará esta edición tan sinalada, froito do traballo e do agarimo de todas as persoas que ao longo destes 50 anos fixeron posible que a festa siga medrando e mantendo vivas as tradicións da zona.

 PUBLICIDADE

Preme na imaxe para obter máis información do evento.

Tras a presentación dos carteis, os asistentes poderán gozar dunha degustación de empanadas e polbo, nun ambiente de convivencia e celebración aberto a todos os públicos.

Desde a Asociación Amigos da Empanada de Bandeira convidan a toda a veciñanza, socios e amigos a acompañalos nesta xornada tan especial, na que celebrarán non só a chegada da 50ª edición, senón tamén cinco décadas de historia, cultura e identidade compartida arredor da empanada.

 PUBLICIDADE

Preme na imaxe para ler o manifesto.

Por outra banda, e como cada ano, para celebrar o Día de Galicia, este sábado 25 de xullo haberá xornada de portas abertas no Mosteiro de Carboeiro con entrada libre. Este é un dos días do ano no que acceder é gratis, ao igual que tampouco hai que pagar para visitar o Mosteiro os días 18 de maio, Día Internacional dos Museos, e o 10 de agosto, Día de San Lourenzo, a quen está adicado o cenobio.

O Mosteiro de Carboeiro segue a ser un dos lugares máis visitados da comarca do Trasdeza. No verán o monumento está aberto todos os días de 11:00 a 14:30 e de 16:30 a 20:00 horas.