A artesá cruceña Elena Ferro gaña un dos Premios Alecrín 2024

A Federación de entidades culturais galegas de Cataluña (Fegalcat) promove anualmente estes galardóns, co obxectivo de recoñecer o traballo de persoas, empresas e asociacións galegas

Laura Moure/Vila de Cruces

O conselleiro de Emprego, Comercio e Emigración, José González, participou este mércores no acto de entrega dos premios Alecrín de Ouro, uns galardóns que organiza a Federación de entidades culturais galegas de Cataluña (Fegalcat) co obxectivo de recoñecer o traballo a prol da cultura galega por parte de persoas, empresas e entidades de diferentes ámbitos. Entre as premiadas está a zoqueira de Merza, Elena Ferro.

Elena Ferro. Autora: Susana Milnes.

No evento -celebrado no auditorio Hernán Naval e que contou tamén coa presenza do alcalde de Ribadeo, Daniel Vega, e do presidente de Fegalcat, Domingo Balboa- o titular de Emprego felicitou aos 13 premiados e celebrou a diversidade e o dinamisamo do talento cultural, artístico, social e empresarial galego, destacando o esforzo e a excelencia que cada un dos galardoados desenvolve nos seus respectivos campos.

Publicidade

Preme na imaxe para obter máis información do evento.

José González manifestou tamén o recoñecemento ao traballo de Fegalcat, unha entidade fundada en 1987 para promover a cultura galega en Cataluña e da que forman parte na actualidade nove asociacións da comunidade catalá. Nesta liña, salientou a importancia dos Premios Alecrín, una cita anual xa consolidada que representa, remarcou, una gran festa da galeguidade e un claro exemplo da capacidade dos galegos e galegas.

Durante a súa intervención, o conselleiro lembrou ademais o firme compromiso da Xunta coas diferentes asociacións e centros galegos, destacando a importancia destas entidades na promoción da cultura e na preservación da lingua e da identidade en diferentes recunchos de España e tamén do mundo. Por iso, sinalou, desde a Consellería de Emprego, Comercio e Emigración, se traballa para seguir ao lado destas entidades, traballando da man dos galegos que están no exterior e buscando maneiras innovadoras de manter e fortalecer os lazos culturais e sociais.

Publicidade

Preme na imaxe para obter máis información.

Galardóns 2024

José González foi o encargado de entregar o premio Alecrín de Ouro no eido empresarial, que este ano recaeu en Jesús Pérez, xerente da Asociación de Comerciantes Industriais, Servizos e Autónomos (Acisa), unha entidade destacada do sector comercial galego e apoiada pola Xunta con máis de 220.000 euros para dinamizar o seu centro comercial aberto e impulsar a contratación de persoas traballadoras desempregadas.

O resto de premiados da edición compúxose por Carmen Rodríguez, directora da Coral Polifónica de Ribadeo (música); a artesá de Vila de Cruces Elena Ferro (artesanía popular); Manuel Blanco, CEO de Pescados Rubén (empresa galega); Serxio María Rodríguez (investigación); Toño Jiménez, comunicador de Onda Bierzo (comunicación); Xosé Benito Reza (defensa da natureza); Manuel Fernández (emigración); Carmen Pérez (defensa da lingua galega); David Ballestar, director da Banda municipal de Ribadeo (traxectoria musical); Manuel Blanco, presidente do Club Deportivo Burela Fútbol Sala Feminino (deporte feminino) e Vanesa Ribas de Festigaleiros (innovación tecnolóxica).