top of page

A ANPA Paxariñas do CEIP de Piloño promove actividades sobre a igualdade e a prevención da violencia

"Contamos con 42 familias socias das 47 conforman a comunidade educativa do centro, polo que representamos ao 89,36 % das familias, contando cun amplo apoio, participación e implicación nas actividades que organizamos", sinala o colectivo


Laura Moure/Vila de Cruces

Poucos, pero aínda quedan colexios no rural que loitan pola súa supervivencia para darlle a mellor das educacións ao rapaces preto das súas casas. Como é o caso do CEIP Plurilingüe de Piloño, que está situado nesta parroquia cruceña. E na súa supervivencia tamén ten moito que ver a ANPA do centro.


"O concello conta cun total de 5.063 habitantes, cuxo 3% son nenos e nenas con idades comprendidas entre 5 e 14 anos. Cun saldo vexetativo negativo de 76, estamos ante un concello rural, envellecido e cunha tendencia á perda de poboación, sendo cualificado polo IGE como zona pouco poboada (ZPP). Alén desta realidade, na ANPA Paxariñas temos un claro obxectivo: acadar melloras para as familias do CEIP Plurilingüe Cerdeiriñas de Piloño e para Vila de Cruces en xeral, facendo especial fincapé en aquelas accións que repercutan nunha sociedade igualitaria".


Publicidade

Neste momento, sinalan que "contamos con 42 familias socias das 47 conforman a comunidade educativa do centro, polo que representamos ao 89,36 % das familias, contando cun amplo apoio, participación e implicación nas actividades que organizamos".


Dentro destas melloras leva a cabo o proxecto de Cambia a pegada facendo unha semana de actividades para fomentar a igualdade e a prevención da violencia de xénero. Para a realización das actividades confiouse en Sororas.gal, que acompañarán ao alumnado e as familias nesta semana de aprendizaxe.


Durante toda a semana no CEIP Cerdeiriñas de Piloño tiveron lugar diferentes obradoiros para o alumnado, colaboracións de asociacións locais, compartindo boas prácticas en materia de igualdade e finalizando o 25N, nunha xornada para as familias, para a creación dunha “Escola de Familias” na que aprender dende a aplicación da corresponsabilidade e a coeducación.

Mural de María Pita que pintou este venres o alumnado do CEIP Cerdeiriñas

"Destes obradoiros realizados co alumnado que tivo un eixo pedagóxico para as crianzas, sacaremos material audiovisual e cartelería, para dar visibilización tanto á comunidade educativa como á sociedade en xeral, para facer un cambio cara a á igualdade, transmitindo e implementando valores que fomenten e promovan a igualdade para traballar dende a base a prevención e rexeitamento da violencia contra as mulleres, tomando como folla de ruta os eixos de actuación que articulan o Pacto de Estado contra a Violencia de Xénero. O noso principal medio de difusión son as nosas redes sociais e a nosa páxina web, onde será publica­do todo o material realizado neste proxecto", sinala a ANPA.


Cambia a Pegada é un proxecto financiado pola Secretaría Xeral de Igualdade, dentro da liña de financiación SI449B para financiar actividades impulsadas polas asociacións de nais e pais do alumnado de promoción da igualdade e de prevenión da violencia de xénero.


Xornada do 25N

"Nesta última xornada faremos a creación da escola de familias. A creación da Escola de Familias é prioritaria para poder chegar á aplicación da perspectiva de xénero no fogar.

As persoas estamos en continua aprendizaxe, polo que é fundamental dotar de espazos nos que as familias poidan falar, compartir e aprender de xeito conxunto, nun espazo no que o coidado mutuo é un dos piares fundamentais. Un espazo no que as persoas usuarias non sexan xulgadas, onde atopen o apoio e entendemento para poder aprender en igualdade e sobre igualdade. Para a inauguración da escola teremos unha primeira xornada na que contaremos con persoas da Asociación Veciñal Minas da Brea, da parroquia veciña de Fontao, e coa Asociación Cultural Garatuzas de Piloño".

Publicidade

A Asociación Veciñal Minas da Brea foi parceira na coordinación do Proxecto Erasmus + “MOMMAS Coffee, Masters of Motherhood Making Awasome Stuff”. Falarán do seu proxecto innovador e experimental sobre maternidade e paternidade, articulado a través de encontros internacionais, actividades locais e unha revista en liña e da metodoloxía que utilizaban para profundizar nas diferentes temáticas, o “World Café” ou “Café Mundial”.

A Asociación Cultural Garatuzas falaranos da súa experiencia como asociación rural que procura a creación de espazos corresponsables e de conciliación para as familias e as crianzas.


"Nesta xornada, faremos un primeiro World Café para falar das redes sociais, os contidos e a súa influencia na afluencia da violencia machista, así como tratar diferentes temas que xurdan durante o parladorio, tomando un café".



0 comentarios
IRS.gif
Copia de ¡TU Anuncio!.gif
Ecos_da_Comarca_neg.png
bottom of page