Ecos da Comarca/Vila de Cruces
O colexio de Piloño vén de recibir a malísima nova de que non haberá servizo de comedor escolar por non haber persoal de cociña. O persoal do CEIP e as familias están consternadas. "66 crianzas comerán de bocadillo mentras a Xunta non subsane a situación", tal como informaba a primeira hora da tarde de onte a ANPA Paxarinhas e o BNG deste municipio. Aínda que a última hora de onte lles comunicaron que terían servizo de catering.
Publicidade
"Trátase dun colexio cun gran repunte de natalidade, cunha comunidade educativa do máis exemplar e lonxe de introducir medidas que axuden a levantar este cole do rural, a Xunta deixa sen servizo se comedor a máis de 60 familias. O Consello Escolar ven de constituir unha Comisión de Emerxencia para facer fronte a esta situación. A ANPA está a facer chamamentos a tódalas institucións e organismos públicos para encontrar o xeito de solventar isto coa máxima premura. Agradecemos todo o esforzo e implicación ao persoal docente, non docente e familias. Tamén agradecemos infinito a labor de Fernando, o cociñeiro que está a sufrir está situación laboral e que tanto deu de si no CEIP de Piloño, pois é parte de todas nós", indica o colectivo que sinala que "dende fai 15 días xa sabemos que o contrato do cociñeiro actual non se renova, porque sobrepasaría os 3 anos de contrato e non se cubreu a vacante de mañá (por hoxe), e non sabemos cando se cubrirá polo que a solución do bocadillo pode ser que sexa de máis días".
Pola súa banda, o o BNG urxe á Xunta a repoñer o persoal de cociña. "A Xunta acaba de retirar o persoal de cociña do CEIP de Piloño. Case 70 crianzas terán que xantar de bocadillo ata que se solucione a situación. Isto é un agravio a toda a comunidade educativa", sinala o Bloque que solicitou ao Goberno Local que actúe.
Por outra banda a través da súa deputada Ariadna Fernández acaba de rexistrar preguntas de urxencia ao respecto no Parlamento. "Reclamaremos o que pertence por dereito ás familias do CEIP de Piloño e a todo o persoal docente e non docente. Preguntámonos se no comedor da Xunta tamén van comer de bocadillo mentras dure esta situación, en sinal de solidaridade coas case 70 crianzas de Piloño", recalca o BNG.
Servizo de catering
Ás 21:24 horas a ANPA deste centro contactou con este medio porque acaban de recibir unha nova notificación. "Temos novo abalar comunicándonos que para mañá e pasado mandarán comida de catering... pero as familias queremos que se repoña o servizo de cociña na maior brevidade posible. Non queremos que se instaure o catering no colexio. Cando ata o de agora sempre houbo cociñeiro, e polo simple feito de non prorrogar un contrato por excederse dos 3 anos de interinidade".
Commentaires