A amazona silledense Mónica Trujillo Souto, (In)Visible do mes de xullo

Hoxe en día segue vinculada á empresa familiar de cría, preparación e venda de cabalos

Laura Moure/Silleda

Este mes de xullo, coincidindo co Día Mundial do Cabalo, poñemos o foco en Mónica Trujillo Souto, unha silledense que representa como poucas a forza da paixón, o esforzo constante e o amor pola súa terra. Mónica naceu en Silleda, e tras vivir e coñecer outros lugares, escolleu voltar á súa terra natal para formar aquí a súa familia. A súa vida estivo sempre vencellada ao deporte e ao compromiso.

Como deportista, comezou a nadar aos seis anos co grupo do CEIP de Silleda, e pouco despois entrou no Club de Natación Lalín. A súa traxectoria na natación levouna a competir en diferentes niveis e probas, culminando na tempada 2005-2006 cun primeiro posto nos 200 metros bolboreta e un segundo posto nos 100 metros bolboreta no Campionato de España de Natación de Verán.

Con todo, Mónica destaca que o máis valioso da natación foron os valores que lle deixou: disciplina, constancia e superación.

Publicidade

Preme na imaxe para obter máis información do evento.

En 2010, con 20 anos, grazas ao seu irmán, descubriu a Doma Clásica e namorouse deste deporte. Durante case unha década dedicouse en corpo e alma aos cabalos ata que unha lesión a obrigou a deixar a montura. Aínda así, continúa hoxe vencellada á empresa familiar dedicada á cría, preparación e venda de cabalos. Mónica fala do mundo ecuestre como unha escola de vida, onde o respecto, a paciencia e a empatía son fundamentais.

O seu traballo e compromiso tamén se reflicten nos logros acadados:

• En 2022, co cabalo Zimbabwe RA e o xinete Carlos Jacobo Sotelo, participou no

  Campionato do Mundo de Cabalos Novos.

• En 2024 e 2025, co cabalo Negrón F, acadaron o 1º e 2º posto,

  respectivamente, no Campionato de España de Pura Sangue Lusitano.

• En campionatos galegos, conseguiron numerosos títulos: campións absolutos,

  por equipos, en categoría de potros…

Publicidade

Preme na imaxe se queres contactar connosco.

Antes de centrarse na doma, participaron en concursos morfolóxicos, onde acadaron premios como “Mellor gandería” e varios “Campións da raza”.

 Con esta deportista local, o  Concello de Silleda, a través do departamento de Igualdade, dirixido por Ángela Troitiño, continúa o programa (In) Visibles: doce meses, doce mulleres, unha iniciativa que arrancou en xaneiro de 2024 para visibilizar a pegada e o legado que deixaron e deixan  as mulleres na sociedade silledense.