top of page

'A administración preto de ti' achegará tamén ao rural os servizos da Dirección Xeral de Tráfico

Persoal das subdelegacións do Goberno desprazarase aos concellos de ata 8.000 habitantes para informar dos trámites que se poden facer desde a casa


Ecos da Comarca/Xeral

O programa A Administración preto de ti do Goberno, que chegou nos últimos meses aos distintos concellos das comarcas de Arzúa, Deza, Terra de Melide e A Ulloa, sumará os servizos da Dirección Xeral de Tráfico aos procedementos que achega á poboación dos pequenos concellos.


Este programa de formación cidadá ofrecía ata o de agora asesoramento sobre os procedementos electrónicos da Administración Xeral do Estado, a Seguridade Social e o Servizo Público de Emprego (SEPE). Agora tamén se incorporan os trámites que xestiona a DXT relacionados, por exemplo, con permisos de circulación ou coa propiedade de vehículos, incluíndo operacións de duplicado de permisos de circulación, baixas, cambios de domicilio e transferencias entre particulares incluídos vehículos agrícolas.

A Delegación do Goberno en Galicia e as catro subdelegacións provinciais xa traballan na segunda fase do programa A Administración preto de ti. Esta nova fase contempla a realización de actividades presenciais, nas que persoal dos distintos servizos explica como relacionarse dixitalmente coa Administración Xeral do Estado, a Seguridade Social, o SEPE e, agora, Tráfico.

Nestas sesións, a cidadanía poder obter, ademais, o certificado dixital imprescindible para a identificación electrónica ante a Administración e aprender a usalo para as súas xestións máis habituais.


Adhesión previa

Durante estas semanas, as subdelegacións do Goberno están a trasladar aos concellos de poboación inferior a 8.000 habitantes de Galicia a posta en marcha da segunda fase deste programa. A participación dos concellos na mesma esixe a súa adhesión previa ao convenio marco asinado entre o Ministerio de Política Territorial e a Federación Española de Municipios e Provincias.

O programa A Administración preto de ti, do Ministerio de Política Territorial, forma parte do Plan de Recuperación, Transformación e Resiliencia, e ten como obxectivo achegar a Administración Xeral do Estado (AGE) ao territorio e facilitar á cidadanía que vive no medio rural o acceso aos servizos públicos sen necesidade de desprazarse a outras localidades.

Na primeira fase, finalizada no mes de marzo, o programa chegou a 239 concellos de Galicia con sesións formativas ás que asistiron 4.200 persoas. Nestas sesións tramitáronse 4.057 certificados dixitais ás persoas convocadas. O persoal que se encargou destas sesións percorreu máis de 24.600 quilómetros para achegarse aos concellos seleccionados.

0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page