Amigos da Empanada entregará a distinción honorífica na I Gala da Empanada que terá lugar este sábado no Auditorio Manuel Dopazo
Laura Moure/Silleda
A Asociación Amigos da Empanada de Bandeira de Silleda anunciou que a actriz galega Lucía Veiga, será galardoada co título de Valedora da Empanada da Bandeira o sábado 8 de abril, coincidindo co Día Mundial da Empanada. Esta distinción honorífica é o máximo título que concede a entidade sen ánimo de lucro a referentes do mundo da comunicación, gastronomía, ciencias, cultura, deporte... en homenaxe á súa traxectoria.
Os Valedores e Valedoras da Empanada adquiren o compromiso de defender á empanada galega en xeral e a Festa da Empanada da Bandeira en particular, alá onde vaian, converténdose en embaixadores dun dos produtos máis significativos da gastronomía galega. No ano 2022, foron premiados Alfonso Rueda, Pepe Domingo Castaño e Fernando Ónega. Agora Veiga sumarase á xornalista María Lama, ao cantante Lode, á chef Lucía Freitas e á xornalista Ana Pardo de Vera.
Lucía Veiga López, nada na Coruña en 1979, é unha actriz, monologuista e presentadora de televisión galega. É licenciada en Filoloxía Hispánica pola Universidade da Coruña. Durante a súa etapa universitaria, colaborou coa emisora comunitaria CUAC FM, ademais de Xacarandaina e da Oficina de Acción Solidaria da universidade.
Xa na súa traxectoria profesional, destaca a súa participación na web serie Galicia Crime, na miniserie Peter Brandon, unha vida pola comedia así como na serie Vivir sin permiso de Mediaset, El desorden que dejas de Netflix ou Rapa de Movistar. No eido teatral, podemos facer mención de obras como Improteka cum laude, Eu queríame casare ou Quero ser maior.
Por outra banda, foi a presentadora da Gala dos XIX Premios Mestre Mateo e en setembro de 2022 converteuse na presentadora principal de Malicia Noticias, un noticiario de humor en formato de comedia informativa que analiza a actualidade dun xeito moi diferente. Xa anteriormente participara noutros programas de TV como Malo será ou Luar da TVG.
NOTICIAS RELACIONADAS:
Lucía Freitas será Valedora desta festa: https://www.ecosdacomarca.com/post/o-bng-de-vila-de-cruces-cuestiona-a-xesti%C3%B3n-financieira-do-concello
María Lama será Valedora desta festa: https://www.ecosdacomarca.com/post/a-xornalista-mar%C3%ADa-lama-ser%C3%A1-nomeada-valedora-da-festa-da-empanada-da-bandeira
Ana Pardo de Vera será nomeada Valedora da Festa da Empanada da Bandeira: https://www.ecosdacomarca.com/post/a-xornalista-ana-pardo-de-vera-ser%C3%A1-nomeada-valedora-da-festa-da-empanada-da-bandeira
O artista galego Lode será distinguido como Valedor da Empanada: https://www.ecosdacomarca.com/post/o-artista-galego-lode-ser%C3%A1-distinguido-como-valedor-da-empanada-da-bandeira-o-8-de-abril
Comentarios