A 3ª Colectiva Algarabía da Asociación Cultural O Naranxo inaugúrase o 4 de agosto

Ecos da Comarca/Lalín

A Asociación O Naranxo inaugurará a súa terceira exposición no mes de agosto. "Falar de Algarabía é falar tamén de arte, parte fundamental da nosa festividade. Este ano é o terceiro no que celebramos a 3a #ColectivaAlgarabía, un camiño polas obras de todas e todos os participantes nas nosas esposicións. Este ano, como corresponde, tócalle a xente da edición do 2022", sinala o colectivo.

Publicidade

Preme na imaxe para obter máis información do evento.

A colectiva, apunta, "é unha maneira de agradecer toda a confianza depositada ano tras ano nun proxecto expositivo que pretende, por un lado tecer redes coa xente do pobo, implicando a locais comerciais e converténdoos en pequenas galerías, e polo outro ofrecendo espazos onde as e os artistas poidan amosar o seu traballo a un público máis amplo.Todas as exposicións repartidas ao longo da vila xúntanse logo, no ano posterior, nunha colectiva onde se fai uso dun espazo destinado especialmente á nosa cultura, ofrecendo así tamén a oportunidade ás e aos artistas de que a súa participación na Algarabía supoña un feito que poida ser válido para incluír a nivel curricular na súa vida profesional".

A inauguración celebrarase o venres día 4 de agosto ás 20:00 horas no Museo Municipal Ramón María Aller e estará a disposición do público ao longo de todo o mes de agosto.

Preme na imaxe se queres contactar connosco.

"Cabe destacar tamén que a celebración desta inauguración marca, un ano máis, unha gran nova...e é que volveremos ter ALGARABÍA, concretamente os días 1, 2 e 3 de setembro. Neste momento xa temos o cartel de actuacións pechado e en breves comezarmos con anuncios de bandas!! Non faltarán tampouco xogos, actividades, obradoiros...e moitas cousas que iremos desvelando ao longo do tempo que nos queda.

Imos coas ganas todas!!".