top of page

19 de novembro: celébrase o Día Mundial en Recordo das Vítimas de Accidentes de Tráfico

IsmaelRS/Xeral

Foto Arquivo

O terceiro domingo de novembro celébrase o Día Mundial en Recordo das Vítimas de Accidentes de Tráfico, unha efeméride proclamada oficialmente pola Asemblea Xeral das Nacións Unidas (ONU), co obxectivo de reducir o número de vítimas en accidentes de tráfico.


As Nacións Unidas proclamaron, ademais, o Decenio de Acción para a Seguridade viaria 2011-2020.


Publicidade

Por que un día dedicado ás vítimas de accidentes de tráfico?

Cada ano morren un gran número de persoas por mor dos accidentes de tráfico, e o máis preocupante é que son a principal causa de falecemento de mozos entre 15 e 29 anos. Preténdese reducir esta fatal estatística porque a maioría dos accidentes de tráfico son prevenibles.


Pequenas accións por parte dos condutores axudan a reducir os accidentes e a que as consecuencias dos mesmos sexan menos graves.


É vital levar postos os cintos de seguridade, protexer aos máis pequenos con sistemas de retención homologados, facer un mantemento adecuado aos vehículos e ser prudentes á hora de conducir.


Por outra banda, os gobernos tamén deben tomar medidas, tanto sancionadoras como de mantemento de vías, boa sinalización das estradas, control dos condutores infractores e outras.


Case a metade das vítimas fatais son peóns, ciclistas e motociclistas. O 90% das vítimas prodúcense en países de ingresos medios e baixos que só contan coa metade dos vehículos matriculados.


Con esta data preténdese reducir o número de vítimas por accidentes de tráfico, pero tamén recoñecer o sufrimento das vítimas e por suposto tamén o labor dos equipos de rescate.


Publicidade

Que facer ante un accidente de tráfico?

Os primeiros 60 minutos despois dun accidente de tráfico son vitais para as persoas que resultasen feridas. De feito, nese intervalo de tempo prodúcense moitas mortes, a maioría por hemorraxias e problemas respiratorios por obstrución das vías aéreas.


Mentres chegan os servizos de emerxencia, a actuación dos cidadáns é vital para salvar vidas. E que podes facer durante eses primeiros minutos cando somos as primeiras persoas que podemos atender aos feridos?


  • En primeiro lugar, debes saber que nunca hai que sacar a un ferido do interior dun vehículo. Como excepción, poderás facelo se a súa vida corre perigo (parada cardio-respiratoria, vehículo ardendo…). Espera a chegada do persoal especializado.

  • Nunca hai que quitar o casco a un motorista accidentado porque implica un risco para a vítima. Só se recomenda se non respira ou o fai con dificultade, e se vomita.

  • Inmediatamente despois dun accidente, hai que aplicar a conduta PAS: Protexer, Avisar e Socorrer. Protexer para que o ferido non teña máis danos dos que xa ten. Avisar aos servizos de emerxencia e socorrer ás vítimas.

  • Para socorrer sería fundamental que todas as persoas soubesen técnicas de primeiros auxilios: manobras de reanimación cardiopulmonar, posición de seguridade, que facer en caso dunha ferida sanguenta, queimaduras e outras circunstancias que se poden dar en caso de accidentes de tráfico.

0 comentarios
IRS.gif
Copia de ¡TU Anuncio!.gif
Ecos_da_Comarca_neg.png
bottom of page