11 ofertas para mellorar tres viais autonómicos nos concellos de Arzúa, Touro, Boqueixón e Lousame

Acondicionarase o firme en varios treitos das estradas AC-207, AC-308 e AC-960, que discorren por estes concellos da provincia da Coruña

Laura Moure/Comarca de Arzúa

A Consellería de Infraestruturas e Mobilidade recibiu 11 ofertas de empresas para executar as obras de mellora do firme en tres estradas autonómicas ao seu paso polos concellos de Arzúa, Boqueixón, Lousame e Touro e que suporán un investimento de 1.006.100 euros.

A actuación, cun prazo de execución de seis meses, prevé rehabilitar o firme en varios treitos das estradas AC-207, AC-308 e AC-960, que discorren polos citados concellos da provincia da Coruña.

A previsión da Xunta é comezar as obras na primavera, co fin de telas rematadas neste mesmo ano.

Os traballos obxecto deste contrato consistirán en realizar fresados localizados nos treitos de actuación e na reposición con mestura bituminosa en quente, ademais da renovación da sinalización horizontal. A Xunta continúa traballando na mellora da rede viaria autonómica co fin de proporcionarlles aos cidadáns unhas estradas cómodas e seguras.