Ángeles Vázquez visitou o novo punto limpo fixo que o Concello de Touro vai poñer en marcha este mes

Ecos da Comarca/Touro

A conselleira de Medio Ambiente e Cambio Climático, Ángeles Vázquez, visitou onte o novo punto limpo fixo que o Concello de Touro vai poñer en marcha este mes no lugar da Santaia e lembrou que o vindeiro ano a Xunta pon a disposición dos concellos máis de 1,6 millóns de euros en axudas para facer melloras neste tipo de instalacións ou mercar puntos limpos móbiles.

A responsable autonómica salientou que a convocatoria, que está previsto que saia publicada no Diario Oficial de Galicia en xaneiro, reserva 1,3 millóns de euros para as melloras en puntos limpos fixos e 350.000 para a adquisición de puntos limpos móbiles.

A titular de Medio Ambiente e Cambio Climático explicou que a recollida separada dos distintos refugallos é fundamental para que poidan ser reciclados ou reutilizados e que por iso a Xunta está a apoiar aos concellos no exercicio das súas competencias en materia de xestión de residuos e na posta en marcha de infraestruturas que permiten ofrecer á veciñanza un servizo máis eficiente e respectuoso co medio ambiente.

Nesta liña, animou aos municipios pequenos a seguir o exemplo de Touro, que neste mes porá en servizo o punto limpo fixo e tamén un punto limpo móbil co fin de facilitar aos seus preto de 3.400 habitantes o depósito daqueles residuos voluminosos ou perigosos que non teñen cabida nos contedores de recollida convencional.

Neste sentido, a conselleira destacou que o Goberno local recibiu unha axuda de 300.000 para a construción do novo punto limpo fixo e preto de 30.000 euros para a adquisición do punto limpo móbil, que desde finais de mes percorrerá cada semana unha das 19 parroquias do concello para facilitar aos usuarios o depósito dos seus refugallos.

Deste xeito, subliñou, as veciñas e veciños deste municipio coruñés contarán a partir de agora cunhas infraestruturas das que carecían e poderán depositar ben nas instalacións fixas ben nas móbiles residuos voluminosos ou perigosos que precisan dun tratamento especial como aparellos eléctricos e electrónicos, pilas, baterías, xoguetes, mobles, restos de poda ou escombros de obras domésticas, entre outros.

 Publicidade

Preme na imaxe para obter máis información.

A representante do Executivo galego puxo en valor que Galicia conta xa na actualidade cunha rede de preto de 380 puntos limpos -entre fixos e móbiles- froito dun investimento da Xunta de máis de 14 millóns de euros desde 2018 e do impulso de máis de 220 proxectos de reciclaxe e reutilización de distintos materiais.

Colaboración

Ángeles Vázquez destacou que a existencia desta infraestrutura sólida ao servizo da cidadanía galega é o resultado da colaboración institucional co único obxectivo de avanzar no eido da sostibilidade e da protección do medio ambiente. Neste sentido, engadiu, os concellos galegos están comprometidos coa consecución dunha Galicia máis verde, máis limpa e responsable que, en definitiva, é unha mostra máis desa marca Galicia Calidade da que presume o conxunto da comunidade.

De feito, a conselleira, que estivo acompañada pola directora xeral de Calidade Ambiental e Sostibilidade, María José Echevarría, incidiu en que este tipo de elementos de recollida selectiva dos residuos non só contribúe a facer unha xestión ambiental máis eficiente e responsable senón que tamén permite crear emprego a nivel local e fixar poboación en concellos rurais como pode ser o de Touro.

Novas instalacións

O punto limpo fixo de Touro, cun investimento global de máis de 330.000 euros, conta con contedores específicos para os diferentes tipos de residuos que poden ser reciclados ou reutilizados e para aqueles que polas súas características especiais deben recibir un tratamento diferenciado e non poden ou non deben ser xestionados polos sistemas tradicionais de recollida de lixo.

Publicidade

Preme para contactar con nós e pregunta polas tarifas que son unha bicoca!

Deste xeito, a veciñanza poderá entregar residuos voluminosos, eléctricos e electrónicos, metais, madeira, papel, cartón, vidro, téxtil, aceites e outros materiais recuperables, facilitando a súa posterior valorización e contribuíndo á mellora da xestión ambiental en todo o territorio municipal.

No caso do punto limpo móbil, cun investimento global de máis de 65.000 euros, consiste nun vehículo todo terreo 100% eléctrico e nun remolque con distintos compartimentos para os diferentes residuos que irá percorrendo cada semana unha das 19 parroquias do concello de Touro. Nel a veciñanza poderá depositar refugallos como aparellos eléctricos e electrónicos de pequeno tamaño, pilas e baterías, xoguetes, aerosois e envases de pintura, lámpadas, cartuchos de tinta de impresora, aceite de cociña embotellado e CD ou DVD, entre outros elementos.